SYUDAD SANG ILOILO – KASUHAN SANG EXPROPRIATION, ini ang pamahog sang National Irrigation Administration ukon NIA sa mga tumandok nga padayon nagapamalabag sa proyekto sa Jalaur mega dam sa Calinog, Iloilo.
Sa ginpa-abot nga reklamo sang grupo sang TUMANDUK, liwat nga ginapilit ang pila sini ka miyembro nga magpirma sang kasugot para sa pagsugod sang proyekto kung indi kasuhan sila sang expropriation.
Ang expropriation nga kaso ginapatigayon sang estado bilang pagsupreher sang kinamatarung sang pumuluyo sa pagdampig sang ila proyedad, particular sa mga tumandok ang ila redor ukon ancestral domain.
Suno sa report sang Jalaur River for the People’s Movement, isa ka alyansa kontra Jalaur dam, wala pa nagrelease sang pondo ang Korean Exim Bank bangud sang madamo nga kaso nga paglapas sang kinamatarung sang mga tumandok.
Nauna na nga nagpagwa ang gobyerno sang Pilipinas sang 450 milyon pesos kay Senate President Frank Drilon paagi sa iligal nga Disbursement Acceleration Program ukon DAP.
Sang nagligad tuig, suno kay anay congressman Augusto Boboy Syjuco kag sang Environmental Network against Pork Barrel and Corruption ukon ENAP, ginahimo nga gatasan ni Drilon ang Jalaur dam para sa pondo electoral sini.
Sa subong, masobra na duha ka tuig nga nauntat ang plano nga pagpatindog sang Jalaur dam nga kuno matapos antes maghalin sa poder si Aquino subong nga 2016./DK
Panay Today 